唔講唔知，香港執紙皮大軍成五千人咁多，其中多數係長者，亦有唔少生活於貧窮線下嘅在職人士，對呢個 所謂國際大都會嚟講，簡直係一個極大嘅諷刺。唉，冇法子喇，香港地搵食愈嚟愈艱難，好多人生活捉襟見肘，搵朝唔得晚，惟有靠執紙皮幫補生計囉。不過咁，呢 班執紙皮大軍可能好快就要失業嘞。
香港環保廢料再造業總會宣布下周五起暫停回收廢紙，表面理由係遇上最嚴峻嘅經營困難，身心俱疲，而真正原因係不滿港府即將關閉觀塘公眾貨物裝卸區，但又冇對業界作出妥善安置，「迫使同業生計陷於瀕危」。
件事其實係咁嘅，當局近年聲稱要美化維港兩岸海濱，所以計劃將觀塘貨物裝卸區改建為海濱長廊，為市民提供一個休閒嘅地方。本來呢，美化維港冇人會反對，弊就弊喺關閉貨物裝卸區後，區內十二個廢紙回收商統統要搬走，咁就有排拗嘞。
當局建議增加藍巴勒海峽裝卸區嘅污染性泊位，但受影響業戶需與現有醉酒灣經營者及同受關閉影響嘅茶果嶺裝卸區業戶一起競逐，而業界就認為咁嘅安排未能解決佢哋面臨結業嘅問題。結果公說公有理，婆說婆有理，雞同鴨講，始終傾唔掂，回收商於是發起罷收廢紙行動，以示抗議。
回收商罷收廢紙，等於斷咗靠執紙皮維生嘅公公婆婆米路，都咪話唔慘。而更弊嘅係，受影響嘅絕對唔止公公婆婆，而係成個環保回收業，隨時塞爆堆填區都有之。有 人計過數，環保廢料再造業總會停止回收廢紙，每日會令堆填區增加三千到六千噸廢紙負荷量，真係唔講得笑。係人都知，本港各堆填區就快逼爆，依家再增加咁多 廢紙，堆填區豈不是更快玩完？到時咪講話將郊野公園攞嚟堆垃圾，就算將禮賓府闢為堆填區都唔掂喇！
其實，廢紙一啲都唔廢，可以循環再造，由廢變寶。據講一噸廢紙可以製造八百公斤再生紙，而製造一噸紙就要斬十七棵樹，你話喇，如果將本港每日產生嘅廢紙全部攞去循環再造，可以斬少幾多棵樹，可以為環保作出幾多貢獻呀！
所以話，回收商罷收廢紙，對環保影響實在好大o架，唔該港府拿拿臨諗辦法拆掂佢喇。其實，辦法唔係冇，問題係當局肯唔肯做啫，如果官老爺肯降低身段，同回收商加強溝通，又點會搵唔到一個合適嘅地方安置吖。
嗱，回收商已講到明，如果港府唔盡快作出妥善安排，佢哋可能會無限期罷收廢紙，到時咯喎，廢紙遍地，香港從此又多咗個新名堂：廢紙港。叮佢個鎯鎯！
沒有留言:
張貼留言